ASKATASUNA, HERRIAREN GIDARI

            Eugène Delacroix

Bosgarrengo leihatilan den

funtzionarioak betaurrekoen gainetik

begiratu eta politeziaz esan dio,

hatz artean boligrafoa duelarik,

ez duela formularioa ondo bete,

xehetasun gehigarriak falta direla,

bertako legeak bortxatu eta

muga ilegalki zeharkatuz sartu dela.

Egoera irregularrean dela beraz

eta ezin diola segidarik eman

bere enegarren eskaerari.

Ulertzen duela baina ezin duela

deus gehiagorik egin,

legeak ez dituela berak asmatu,

ez dela bere errua hau dena.

Ordu bietan amaitu eta

etxera egin du funtzionarioak,

gorbataren korapiloa askatu,

kafea mikrouhinean berotzen ipini

eta Fortniten hasi da jolasean.