HERIOTZA EZ TRAUMATIKOA

Lankideak tipo alegera zela

esan du etsita,

sinestezina dirudiela,

atzo bertan egon zela berarekin,

zigarreta bere esku dorpeekin

biltzen ikusten duela oraindik,

betiko Würth markako

kotoizko peto marroiekin,

bisera zaharra buruan,

irribarre maltzurra ezpainetan.

Bizkarreko minarekin zebilela,

baina ez kezkatzeko, ondo zela

nahiz eta lantokian Fenwick orgak

harrapatu zuenetik ez zen erabat osatu.

Bere buruaz beste

egin duela zabaldu da,

esan du beste lankide batek

barbiturikoak hartzen zituela

eta bere etxean zetzala gorpu

zoruan botata.

Aldi baterako

bizitza prekarioan zen

lankideari autopsia egingo

diola agindu du forentseak.

Beilategitik etxera bidean,

esnebidean aurkitutako zulo beltzak

unibertsoa ulertzeko modua

alda dezakeela entzun dut.