TRENAREN ZAIN

Goizaren ertzean

Aturri ibaia agertu da lanbropetik

Errobirekin bat egin

eta hazita dator ozeanorantz egiteko

lauhazkan noa, orpoak urratu arte,

hatsa galtzear

Henri Grenet zubi gorria igarota

iritsi naiz

Sainte-Ursule karrikako

tren geltokira

jendarme pare bat baino ez

sarreran zaindari.

Albiste garrantzitsurik

gabeko eguna da gaur

bidaia agentziek

zeru urdin argiak

eta artxipelago exotikoak

eskaintzen dituzte

katalogo distiratsuetan.

Eta berriro nire buruko lainoetatik

euri txiki hau.