ABENDUAN

Abendua da eta lehendakariak

zortzietan emango duen

adierazpen instituzionalaren zain dago jendea.

Kale kantoietako bozgorailuetan

gabon kantak aditzen dira,

errugbi matxari begira daude gehienak,

haurrak izotz-pista artifizialean dostatzen,

gaztaina erre usaina dario

Gambetta karrika nagusiari.

Diotenez, beste gorpu bat

atzeman dute Bidasoan,

informatiboetako unitate ibiltariak bertan dira.

Ez dute oraindik identifikatu ahal izan,

baina etorkina izan daitekeela diote,

ilegala ote den,

papergabe horietakorik.

Abdullah izan zitekeen, Ibrahim bestela,

akaso Mohamed edo Assila.

Abendua da eta hotz egiten du.

Jendea uros da terraza berotuetan,

euforia performatua irudika daiteke

haien algaretan.

Plazaren erdian gabonetako pinua dakusat

eta sardindegian egiten ari

diren bigarren eskuko

ilusioen salmentan

aspaldian ikusi gabeko ezagun batek

bostekoa eman dit:

guri lana kentzera datoz horiek

esan du boxer arrazako

txakurra sokan hartuta.