EGUNEROKOA

Astelehena, Soldata Arrakalaren Aurkako egunean

zor patriarkala gogoratu dute prentsa digitalean,

Aitziber amaren gorputz nekatuarekin gogoratu da.

Kaosaren teoria ikusgai da Guggenheim museoan.

Asteartea, Conquiseko Eneko lur jota omen da

uste baino lehenago kanporatu dutelako.

“Negar ez egiten saiatu naiz, baina ezin izan diot

eutsi eta negarrari eman diot azkenean”,

esan du hunkiturik.

Asteazkena, ezohiko gobernu bilera deitu du

Urkulluk eta bozak apirilaren 21ean izango direla

esan du. “Katebegi bat naiz”.

Osteguna, interneten irakurri dut Lynda izeneko

ingeles bat klinikoki hilda egon dela minutu luzez,

Everest baino askoz handiagoak diren mendiez

inguraturik eta lorez betetako zelai batean

egon dela ihardetsi die kazetariei.

Info insolite en continue France Inter.

Ostirala, horoskopoak bere buruan konfiantza

izateko eskatzen dio Pisces zeinua duen Alaitzi,

lortuko duela bere helburuak betetzea eta

izango duela norekin partekatu bizitza

eta izateko pazientzia

—eta zoriona norabidea balitz eta ez leku bat?—.

Larunbata, 3. solairuko Aintzanerekin egin dut topo

jolas parkean, jada ibiltzeko gai ez den amonaren

txakurra ateratzen du pasieran sos batzuen truk.

“Ikasketak ordaintzen laguntzeko”.

Berangon erdara nagusi dela irakurri

diot Juan Luis Mugertzari.

Igandea, Capbretonen gaude oporretan.

Ez dakit zergatik den —edo agian bai—, baina

lasaitasuna ematen digu leku honek.

Hantxe “Bila ibili gabe genbiltzan

baina jakinik elkar aurkituko genuela”

hitzartu ginen lehen aldiz, gogoratzen zara?

Ezkerreko bekaina gora duen emojia jaso dut

mugikorrean, luzerako al dudan galdetu didazu,

etxerakoan ogia ekartzeko otoi.