GREBA EGUNAK

Carrefourreko aparkalekuan

nago auto barruan.

Haize erauntsiak agure bati

aterkia hautsi dio

akuarelaz egina dirudi

paper granulatuan marraztutako

egun hits honek.

Labek, Cfdtek eta Cgtek

greba egunak antolatu dituzte

—abenduaren 20tik 23ra arte—

ez dutela etsiko

esan du jaka horia duen andreak

mila eta berrehun euroko

soldata, hiru haur eta

bakarrik bizi dela.

Ondotik igaro den emakumeak

maskara kokotsean duela

haserre kazetariari:

erosteko eskubidea

urratzen didate niri

grebalariek

eta merkataritza-gunean sartu da

fededunak elizara sartzen diren

debozioarekin.

Ekaitza gero eta

perfektuagoa da.