La recessione

I jodarìn barghèssis cui tacòns; / tramòns ros su borcs vuèis di motòurs / e plens di zòvins strassòns / tornàs da Turin o li Germàniis. // I vecius a saràn paròns dai so murès / coma di poltronis di senatòurs; / i frus a savaràn che la minestra a è pucia, / e se ch’a val un toc di pan. // La sera a sarà nera coma la fin dal mond, / di not si sentiràn doma che i gris / o i tons; e forsi, forsi, qualchi zòvin / — un dai pus zòvins bons tornàs al nit — // a tirarà fòur un mandulìn. L’aria / a savarà di stras bagnàs. Dut / a sarà lontàn. Trenos e corieris / a passaràn di tant in tant coma ta un siùn. // Li sitàs grandis coma monds, / a saràn plenis di zent ch’a va a piè / cui vistìs gris, e drenti tai vuj / ’na domanda, ’na domanda ch’a è, // magari, di un puc di bès, di un pìssul plazèir, / ma invessi a è doma di amòur. I antics palàs / a saràn coma montagnis di piera / soj e sieràs, coma ch’a erin ièir. // Li pìssulis fabrichis tal pì biel / di un prat verd ta la curva / di un flun, tal còur di un veciu / bosc di roris, a si sdrumaràn // un puc par sera, murèt par murèt / lamiera par lamiera. I bandìs / (i zòvins tornàs a ciasa dal mond / cussì divièrs da coma ch’a èrin partìs) // a varàn li musis di ’na volta, / cui ciavièj curs e i vuj di so mari / plens dal neri da li nos di luna — / e a saràn armàs doma che di un curtìs. // Il sòcul dal ciavàl al tociarà / la ciera, lizèir coma ’na pavèa, / e al recuardarà se ch’al è stat, / in silensiu, il mond e chel ch’al sarà. // Ma basta con questo film neorealistico. / Abbiamo abiurato da ciò che esso rappresenta. / Rifarne esperienza val la pena solo / se si lotterà per un mondo davvero comunista.