Kristau-maitasuna gutxi iruditzen Ribh-i

Zergatik ibili behar dut amodio bila edo hura aztertzen?

Jainkoarena da hori, giza adimenetik haragokoa.

Arreta handiz aztertu dut gorrotoa,

neure mende dudan grina baita,

erratz moduko bat —arimatik uxatzeko

esangurarik edo zentzurik ez duen oro—.

Zergatik diot gorroto gizonari, emakumeari edo ezeri?

Nire arima arretatsuak bidaltzen didan argia da.

Izutik eta atzipetik askatuta, aurki ditzake

zikin-hondarrak, erakuts dezake azkenean

nola arimak aurrera jo dezakeen halako gauzak amaitzean,

nola ibil zitekeen halako gauzak agertu baino lehenago.

Orduan, nire arimak amore eman eta bere kasa ikasiko du

ezagutzarik ilunena eta gorrotatuko du gizadiak Jainkoaz

izan duen pentsamendu oro.

Pentsamendua soineko bat da, eta arima andregai bat,

eta ezin ezkutatu ez zaborretan ez apainduretan:

Jainkoa gorrotatzeak Jainkoarengana bideratu dezake arima.

Gauerdiaren ukaldian, arimak ezin iraun

gorputzaren edo buruaren altzari barruan.

Zer har dezake, bere Maisuak eman arte!

Non begira dezake, Hark erakutsi arte!

Zer ezagut dezake, Hark proposatu arte!

Nola bizi, beraren odolean Hura bizi arte!