Innisfreeko aintzirako uhartea

Zutitu eta banoa oraintxe, banoa Innisfreera;

hantxe bordatxo bat eraikiko dut buztinez eta erratz-landarez,

bederatzi babarrun-errenkada ipiniko ditut,

erleontzi bat ere bai eztia ateratzeko;

hantxe biziko naiz bakar-bakarrik, erlarotsez inguraturik, alai.

Han bake pixka bat izango dut, han bakea tantaka

isurtzen baita, emeki, goiztiriaren zapietatik tantaka,

kilkerrak kantatzen duen alderaino;

han gauerdia guztiz da zohardi, han eguerdia purpuraz dirdaitsu,

eta ilunabarra, txoken zalapartaz betea.

Zutitu eta banoa oraintxe, ezen gau eta egun entzuten dut

hango ura doinu sakonez ertzak miazkatzen;

errepidean edo espaloi grisean zutik nagoela,

nire bihotzaren erdigune sakonean dantzut doinu hori.