Irlanda datozen urteetan

 

Jakin gogoan izango nautela

anaiarteko kide benazkotzat,

Irlandako gaizkia arintzeko kantatu nituelako

hala baladak eta istorioak, nola lelo eta doinuak,

eta ez gai horiek baino gutxiago

emakume baten gona

arrosa gorrizko ertzez apaindua,

emakume horren historia hasten baita

Jainkoak aingeruen korua sortu aurretik

eta alderik alde zeharkatzen baitu orrialde idatzia.

Denbora amorruz orroka hasi zen

eta haren oin arinen erritmoak

Irlandaren bihotza taupaka abiarazi zuen

eta Denbora horrek agindu zuen

kandela guztiak pizteko

han eta hemen erritmoari argi egitearren

eta Irlandaren pentsamenduak osa zitezen

gelditasun erritmikoaren habian.

 

Ez ahal naute estimatuko Davis,

Ferguson eta Mangan baino gutxiago,

ezen ondo epaitzen dakienarentzat

nire bertsoek haienek baino gehiago diote

sakonean aurkitzen diren gauzei buruz,

non gorputza soilik baitatza lo.

Izaki elementalak dabiltzanez

nire mahaian alde batetik bestera,

bizkor ibili behar erritmorik gabeko gogamenetik

amorruz ihes egiteko, uholde zein haizete;

baina urratsa erritmoz egiten duenak

jakingo du noski begirada baten ordez bestea ezartzen;

gizonak beti hala egiten du bidea

arrosa gorrizko ertzez apainduriko gonaren atzetik.

Oi, ilargipean dantzan zabiltzaten maitagarriok,

druiden lurrak, druiden doinuak!

 

Ahal dudan artean, zuretzat dut idatziko

bizi izan nuen amodioa, ezagutu nuen ametsa.

Jaio ginenetik hil arterainokoa

begi-kliska bat besterik ez da;

eta gu, geure kantua eta maitasuna,

Denboraren Erritmoak goian argitzen duena

eta gauza ezkutu ororen igaroa

nire mahai gainean alderik alde,

badoa guztia, benetako estasian urtuz,

amodioarentzat eta ametsarentzat

inongo lekurik ez dagoen aldera;

izan ere, Jainkoaren urratsak

arrasto zuriak uzten ditu.

Bihotza iraultzen dut ene bertsoetan,

hala, datozen denbora nahasietan,

jakin dezazun nola nire bihotza doan

arrosa gorrizko ertza duen gonaren atzetik.