Zeru hotza

Tupustean, beleek atsegin duten zeru hotza ikusi nuen;

izotz errea zirudien, hots, izotzagoa are, eta, ondorioz,

imajinazioa eta bihotza hain bortizki erakarri zizkidan, non,

hari eta honi buruzko ezusteko edozein gogoeta deuseztaturik,

oroitzapenak baino ez baitzizkidan utzi, garaiz kanpokoak

gaztaroko odol beroarekin aspaldi topatutako amodioarentzat;

eta erruduntasun orori zentzu eta arrazoi oro erauzi nion,

harik eta oihu, dardara eta hara-hona balantza egin nuen arte,

argitan blai. Oi! Noiz hasi zen izpiritua berpizten,

hil-oheko nahasmendua aienaturik, noiz izan zen

bideetan barrena biluzik bidalia, eta, liburuek diotenez,

zeruaren injustizia dela-eta zigortua izatera kondenatua?