Jane zoroa apezpikuari mintzo

Apezpikua topatu nuen bidean

eta ederrak bota genizkion elkarri:

“Hire bularrak zapal eta eroriak zauden,

laster ihartuko zaizkin zainak;

bizi hadi jainko-etxe batean

eta ez txerri-korta batean”.

“Narrasa eta txukuna kide dituk,

txukunak narrasaren beharra dik”, egin nion oihu;

“Nire lagunak aienatuak dituk, baina, egia esango diat,

ez niean ukatu ez ohea ez hilobia,

hori ikasi bainuen gorputzaren apaltasunetik

eta bihotzaren harrotasunetik.

”Emakumea harro eta ttentte izan daitekek

amodioz ari denean,

baina maitasunak bere egoitza gorotzaren

orubean eraikitzen dik,

ezin baita ezer osorik eta bere kasa izan

aldez aurretik urratu gabe”.