PADURAN ATSEDEN HARTZEN

Musker egartsua

Harrian mimetizatuta

Fosil bat burezurrean bezala

Hego haizeak gidatzen du

Padurako ihien koreografia

Lo arinean dago arratsaldea

Nire bihotza

Lurra atzaparkatzen

Basurde erotuaren antzera

Urrezko zauriei esker

Ibilera berrietan

Murgildu zait gogoa

Te berdeko errekak

Freskatzen dizkidala

Oinak eta barnea

Aterki puskatu bat ekarri du

Harrotzen hasia den haizeak

Eta begi bat galdu dut kasik

Datorren legez doa egia

Oraintxe bertan ordea

Bakean nago euliekin

Bakean nire ekaitzekin

Nirekin bakean