BIZIRIK

hildakoentzat ari da orkestra

eta uzkurtu egin dira

azken muturreraino

bizirik daudenen bihotzak

ballet dantzarien

arintasunarekin liluraturik

nabarmenagoa iruditzen zait

existentziaren pisua

burdinazko barra goria

eskuineko eskuan

itsasontzi deseginaren aingura

ezkerreko eskuan

gustukoak ditut

ausart egindako

errugbiko plakatzeak

gustukoa dut

fruitu arbolak diruditen

ezezagunekin mintzatzea

gustukoa dut

gorputz biluzi bat

urpean igerian ikustea