UDA BILUZIA

Uda erromantikoa

arinki elkar ukitzen duten kaioletan.

Sagutxoak bailiran piku heldugabeak zintzilik

kilkerrek eguzki-lore urdinak bilatzen dituzte

intsektu urdurien sasoian gaude

zelaietan eta igerilekuetan

sexu-jolasaren sasoian gaude

izar hegalarien sasoian

titi-zorro beltz eta laranjena

kresal eta limoiz igurtzitako sabel, bular, sorbaldena

argi eternalaren udan

erreka egartsuen udan

gorputz gazte bustien abegikortasunaren udan.

Itsasneska zoriontsuak

alfonbra hegalariak

hazi partekatua

marrubi urtsuko plazeraren irrika

barrearen lagunarteko oparia

hitzen beharrik ez duten ezpain leun emankorrak

Heriori egindako laido inkontzientea

azkazaletan, gogoetetan

kolore bizi aniztunak

elkarrekin trukatutako janzkiak

zapore berriko izozkiak

etengabeko esperimentatzea

geratzen zaizkigun negu saihetsezin guztien

aurreko uda.

Lorategi amnesikoen

gordeleku lizunen

begirada tentagarrien

uda biluzian gaude

gure txankleten pean baldosa kiskaliak itolarrian

zizare lodi aseezinek gure izenak errezitatzen dituzte

noizbait hasitako adur txarreko enkantearekin segituz

gu gortzen goazela

inuzenteki alai gabiltzalarik

bozgorailu erraldoien alboan

jolastoki oktogonaleko algararen erdian

agur esan nahi ez diegun

bihotzen dardara miragarriaren oihartzunean.

Eta goizaldean eurixka ari du logale den munduan

goizaldean eurixka neska maitagarriaren soinean

fruituaren hezurra eta fruituaren azala gara

jenderik gabeko lili-uhartean

eremu agortua den hiriaren atarian

paranoia eta ironiarik gabeko amets-bidean

bizitzari lotuak gerrikoaren beharrik gabe

bat eginik ziurgabetasun ezaren usain gozoan.

Azukrezko sugandilak daramatzat poltsikoetan,

bai, hauxe da

geratzen zaizkigun negu saihetsezin guztien

aurreko uda.