KANTUAN KARDAMIRUAK

Badira zine eskolak eta idazle eskolak

ez dut bereziki maite gimnasia erritmikoa

nazkatu egiten nau inguratzen eta gainditzen gaituen

eguneroko gehiegizko dramatizazio geldiezin honek:

burezur forma duten ordenagailuak mahaietan

azeri tranpak kale-txakurrentzat

itxurazko dadaismoaren zale kartsuak

euren diseinuzko taberna eta terraza aratzetan

imintzio neurritsuez elkarri plazer mengela ematen

ezerezaren interpretazio zehatzak buruz ikasten.

Egidazue fabore bat: etzan zaitezte

hondarretan belarretan goroldioan lurrean

eta entzun ahalegin faltsurik egiten ez duen haizea

gaur oraindik gutaz barre egiten ez duen hegazti hori.

Badira eskolak gastronomia sofistikaturako

dirutzazko unibertsitate masterrak

goi-mailako lapurretan trebatzeko akademiak

gure lanari nola egin trufa

sagar saskia zizareez nola bete

nahiago dut borroka greko-erromatarra

Tourrean txirrindulariak Pirinioak eta Alpeak igotzen

Giroan txirrindulariak Dolomitak eta Alpeak igotzen

edertasuna dago paisaian

edertasuna dago esfortzuan eta sufrimenduan

edertasuna dago gizatiarra dirudien guztian

eta barne hartzen gaituen naturan.

Nire xurgagailua ez da robotikoa

laketgarriak zaizkit espartzuzko erratz xumeak

oztopoz beteta dago egiarantz daraman zirkuitua

baina ausardiarik baduzu beti jakinen duzu irri egiten.

Nahiago dut balleta

ondo egindako gauzak miresten ditut baina ez ospea

ustelduta ez bada pozoituta datoz azukre koxkorrak

ate birakariak kristalezko orratzak

kode selektiboak belusezko jauregietan.

Badira zine eskolak eta idazle eskolak

badira finantzen mundua eta apustuen mundua

ikaragarrizko etxe-orratz erraldoiak

Domus Aurearen erreplikak Neronen nostalgikoak

inposaketa eta makurtzea bilatzen duen sekta berri bat

harrokeriaren tribuna koloniaz bustitako arratoiez gainezka

erudizio faltsua politika faltsutuak

puzten doala arrandiaren kupula

gero eta jarraitzaile berri gehiago ditu

igelen eta ornitorrinkoen arteko orgiak

eta azkarregi bikoizten dira biktima zaharrak

eta azkarregi hondatzen bezero arrunten ongizatea.

Deskonposizioari kantuan kardamiruak.

Elurrez inguratutako borda isolatu bat.

Aztoramen eta erakuskeriarik gabeko denbora.

Hortxe egon nahi dut. Horra iritsi nahi nuke.