Najwan Darwish

Palestina, 1978

itzulpena: Garazi Ugalde Pikabea

Fobia

Hiritik kanporatuko naute gaua heldu aurretik

esanez ez niela airearen faktura ordaindu,

ez nuela argiaren prezioa pagatu.

Hiritik kanporatuko naute ilundu aurretik

esanez ez nuela errentarik ordaindu eguzkiagatik,

ez kuotarik hodeiengatik.

Hiritik kanporatuko naute eguzkia atera aurretik

gaua gaitzetsi nuelako eta ez nituelako izarrak goretsi.

Hiritik kanporatuko naute sabeletik atera aurretik

zazpi hilabetez existentzia behatu nuelako eta poemak idatzi.

Existentziatik kanporatuko naute ezerezera lerratzen naizelako.

Ezerezetik kanporatuko naute

existentziarekin lotura susmagarria dudalako.

Existentziatik eta ezerezetik kanporatuko naute

bilakaeraren kume naizelako.

Kanporatuko naute.