Zipreko Salamina

 

… eta Salamina hura zeinaren ama-hiria orain

deitore hauen kausa baita.

Persiarrak

 

Batzuetan eguerdiko eguzkia, batzuetan euri-izpi eskutadak

eta hondartza antzinako treska puskaz betea.

Kaskarrak zutabeak; San Epifanio bakarrik

urrezko Inperioaren ahalmena —ilun, hondoratua— erakusten.

 

Gorputz gazteak hemendik igaro ziren, maiteminduta;

bularrak taupaka, oskol arrosak eta oinak

beldurrik gabe uretan korrika

eta besoak zabalik desirarekin elkartzeko.

Jauna ur zabaletatik,

igarobide honen gainean.

 

Orduan entzun nituen oinkadak harri-koskorretan.

Ez nuen aurpegirik ikusi; ni jiratzerako alde egin zuten.

Halere ahotsak, idiaren oinatza bezain astun,

han jarraitu zuen zeruaren zainetan itsasoaren oldarrean

hartxintxar artean, behin eta berriz:

 

“Lurrak ez dauka heldulekurik

sorbaldan hartu eta alde egiteko

ezin dute ezta ere, egarri egonagatik,

itsasoa gozatu baso-ur baten erdiarekin.

Eta gorputz horiek,

ezagutzen ez duten buztinez egindakoek,

arimak dituzte.

Tresnak biltzen dituzte aldatzeko,

baina ez dute lortuko: desegin besterik ez dituzte egingo

baldin eta arimak desegin badaitezke.

Garia ez da berandutzen ernetzeko

ez du denbora asko behar

samintasunaren legamiak hazteko,

ez du denbora asko behar

gaizkiak burua altxatzeko

eta husten den gogo gaixoak

ez du denbora asko behar

eromenez betetzeko,

bada irla bat…”.

 

Beste gerrako lagunok,

hondartza eremu lainotsu honetan

zuongan pentsatzen dut eguna igaro ahala —

borrokan hil ziren haiek eta urte batzuk geroago gatazkan hil ziren haiek

egunsentia heriotzaren antzigarrean ikusi

edo, bakardade basatian izarpean,

erabateko zoritxarraren begi more ikaragarriak

euren gainean sentitu zituzten haiek;

eta baita otoitz egin zuten haiek ere

altzairu kiskalgarriak itsasontziak zerratu zituenean:

“Jauna, lagundu gogoratzen

sarraski hau nola gertatu zen:

harrapakeria iruzurra norberekeria,

maitasunaren idortzea;

Jauna, lagundu horiek erauzten…”.

 

— Orain, harri-koskor hauetan, hobe da ahaztea;

mintzatzeak ez du balio;

nork alda dezake boteretsuen aldartea?

Nork lor dezake berari entzunaraztea?

Bakoitzak bereiz amesten du eta ez du besteen amesgaiztoa entzuten.

 

— Bai; baina mezulariak korrika egiten du

eta, bere bidea luzea izanagatik, eramango die

Helespontoa kateatzen saiatu ziren haiei

Salaminako albiste beldurgarria.

 

Jaunaren ahotsa uretan.

Bada irla bat.

 

Salamina - Zipre, 53ko azaroa