OINAZEA

kristala hormaren kontra txikituko litzatekeen moduan

halaxe apurtu dira burdin hesira jaurtitako loreontziak,

eta horren ostean garrasiak, gero eta ozenagoak,

elefante zahar hil hurren baten orroen antzekoak

gizon bat belauniko jarri da hesiaren atzealdean,

bere eskuak lorontzi puskatuen artetik gelditu ezinik,

eta adurra darien ezpainetatik garrasika hasi da berriro

film bateko berba batzuk etorri zaizkit orduan gogora:

ez dakit oinaze ikaragarria dutelako zoro ote dauden

ala zoro daudelako oinaze ikaragarria duten

belauniko, garrasika eta negarrez segitzen du

bere arimaren ispilu bihurtu diren puska txikituei begira,

beharbada bihotza holaxe daukalako,

hamaika zatitan birrinduta