BELUSEZKO SUGEA

Rock Rebel Fashion

holaxe idatzita dauka nikiaren aurrealdean

iragarki batean agertu den gazte batek,

eta txiklea mastekatzen duen bitartean

Sid Viciousek erabili ohi zuen nazka keinu artifizialaz

ez isiltzeko esan dizu telebistaren pantailatik,

esateko daukazun gauza mordoa

lau haizetara zabaltzeko aukera ematen dizula

marka ospetsu horrek,

hala nola, zu zeu benetan izateko aukera paregabea.

Baina, lagunok, iruzurra belusezko suge ederra da,

kokotetik zulatu eta burmuina astiro xurgatuko dizuna.

Giza manikiak izen handiko markek jantzita,

non Che Guevararen irudia, haren jokabidea ezabatuta,

Mickey Mouserenarekin pareka dezaketen

(a!, pop artea zoragarrrria zara...)

eta Bob Marley Marilyn Monroerekin

(biei gogotik emanda, aurretik eta atzetik)

eta Lenin, sobietei berbetan mitin sutsu hartan,

oihuka dabiltzan tarzan birekin haren alboetan,

edota Malcom X bongoak jotzen Disneylanden...

Halako batean, basque fashion izenpeko amarruaz,

lasai asko jarriko digute Argala edo Zumalakarregi

Madonna erotiko zerutiar baten bizkartzain modura.

Baina be cool, lagunok, be cool,

pop art ondo koloretsua, su itzaliaren cold-ture,

Botereak nahi bezala, iraultza sodomizatua,

be cool, lagunok, be cool-ture, be happy

don't worry ezertaz eta be happy.

Lau egunetarako munduratu ei gara

eta pastel erraldoi honetatik striper bat

agertuko zaizula diotsu belusezko suge eder horrek.

Beraz, musukatu egingo duzu sugearen ahoa?