APIRILAK 28

Mundua itzali da

nobela bat irakurtzen nengoen

Apaizen pasealekuan

mobiletik nobela bat irakurtzen

oraindik argitaratu ez den zerbait

beste zerbait

guztiz irentsi nauena

candy crushak

instako reelsek

eta pipa paketeek bezala

etxeratu naizenean konturatu naiz

“denok hilko gara”-ka sare sozialak

hiltzear dagoela storyak

egingo ditu jende batek

sekula ez hiltzeko eskatzen

nien gurasoei umetan

“ez hil, bale?”

heriotza zer den ikasteak

beldurra ematen du

gero nerabea zara eta

banku batean pasatzen duzu urtea

“ojalá se muera”-ka

benetan sinisten ez nituen gauzak

gaztelaniaz esaten nituen

hizkuntza hautuak

konplexuak dira

arrazoi bat dute maiz

gero inoiz baino umeagoa zara eta

mediku bati baimena ematen diozu

zure aita hil dezan

haren gelara sartu eta

“ez hil, bale?” esaten diozu

begiradarekin

hainbat aldiz amaitu da mundua

denon bizitzan.