TIRANTEDUN KAMISETA ZURIA

Ixten ditut begiak eta

hortxe zaude.

Eguzkiak ilundutako azala

tirantedun kamiseta zuriaren azpian

zeinen ondo gelditzen zaizkizun

masail gorriak.

Eskaileran gora zatoz

gereziz betetako kaxa bat eskuetan

ze sinplea den plazera.

Ixten ditut begiak eta

hortxe zaude.

Berandura arte lo egin duenaren azal markatua

tirantedun kamiseta zuriaren azpian

zeinen ondo gelditzen zaizkizun

makarrak begi puztuen ondoan.

Bainujantziaren marka nabari zaizu

ipurmasail bietan

ze sinplea den plazera.

Ixten ditut begiak eta

hortxe zaude.

Zilarrezko katea

tirantedun kamiseta zuriaren azpian

zeinen ondo ateratzen zaizun

lesbiana modernoaren performancea.

Kamiseta kendu nahi dizudala esan dizut

titiak erakutsi dizkidazu

tirantedun kamiseta zuri bat

baino sinpleagoa da plazera.

Gurago nuke uztaila balitz berriz

baina otsaila da, argia joan da

eta hemen nago

esne hotzetan hondoratu diren

zerealak afaltzen.