POEMA BATEN CURRICULUMA

 

 

                            SORRERA

 

Elurtzan zain egotearen akidura.

 

Utz iezadazu beste aldera pasatzen

eta zu batzen

hesi bateko taketak bezalako lerro motzetan

edo ostarkuko sugearen antzeko lerrokada malgutan.

 

Arrakalatik zelatan egotearen akidura.

 

 

                            JAIOTZA

 

Nire begian jaioarazten ditut zure begiak

pentsamenduaren dorpezia erdeinatuz.

 

Kliska eginda zirriborratu behar zenituzke

koherenteak ez diren zeinuak

posibilitate infinituen sistema honetan.

 

Zure nini berriak galdez ari dira

nire irisaren tankeraz.

 

Erantzun bakarra dut: kristala, datarik gabe.

 

 

                            GARAPENA

 

Zure ahoa nire bularreko paperari diktatzen.

Zure biloa nire ilearen glosak laburbiltzen.

Zure zukuak nire sexuko tinta azpimarratzen.

Zure hatza kolkoaren aurkitegia seinalatzen.

 

 

                            MINTZOA

 

Adar-hostoetan ugaritzen den zuhaitz lerdenarena.

Lata zaharra eta arratoitzarra flotean diren potxingo uherrarena.

 

 

                            EZAUGARRI OSAGARRIA

 

Metapoeman metatu ohi ditut nire metak, temak eta mitemak.