DESERRIRATUAREN BODY ARTEA

 

 

Inbidia diot nire sustraiari,

nire putzuaren sakoneko

iluntasunari

gogor egiten dion sustraiari.

Marina Tapia

 

 

Urratsetan haziak ereinez bezala noa.

 

Burua jiratu dut Aralarrerantz.

Hantxe dira kalendula eta kamamila,

jengibrea, aneta, albaka,

mugurdiondoaren hostoak eta linazia.

 

Urratsetan haziak ereinez bezala noa.

 

Analfabetoa naiz; ez hala nire eskuak.

Zer deskuidu izan duzu, Martija Jauregikoa?

Erditze-minak ez dira zeruaren zigorra.

Ez da krimena ahizpak aholkatzea.

 

Urratsetan haziak ereinez bezala noa.

 

Umetako kresala iruditzen zait airean,

Garraitz uhartea dagoen herrikoa.

Estellerritik bista galtzen den tokiraino

asko gara batuta gari-azao berean.

 

Urratsetan haziak ereinez bezala noa.

 

Ataka anitzetan frogatu dut jakintza:

hesteak ebaki eta zilborrak osatzean,

jaioberrien zuloak irekitzeko eran,

zesarea eta abortu maneiatzean.

 

Urratsetan haziak ereinez bezala noa.

 

Amantala eta mahukatxoak beti garbi;

orobat matxarda, labana, artaziak.

Zergatik eme-minak baretzea

ez du begiko Ebaren semeak?

 

Urratsetan haziak ereinez bezala noa.

 

Makatza eta erroia dira bizitza eta heriotza.

Zinta bat bien artean amaren esnea

Eskolastikak eta Brigitak zaindua,

dragoiari itzuritako Marga Antiokiakoak.

 

Urratsetan haziak ereinez bezala noa.

 

Zurmindurak eta kakeria ere ontsatzen ditut.

Gazte gaixo batek gasolindegi batean

galdutako arima ere aurkitu nuen behin

arrano batek tokia erakutsita, Gorbeian.

 

Urratsetan haziak ereinez bezala noa.

 

Gorputz hau endredatuko balitz lurrarekin.

Harkaitza balitz paisaiarekin hizketan.

Ana Mendietaren eskultura bat izanik,

zuhaitz hazi deserriaren urratsetan.

 

 

 

Josune Muñozentzat