OTOITZA

 

 

Mary Blair, zeruetan zarena,

dohatsu izan bedi zure izena.

 

Etor bitez inon ez diren uneak,

toki bila baitabiltza albumean.

 

Egin zen zure nahia: psikeak grabatzea

burdinaren ausikiak zura bezala.

 

Eman zenigun eguneroko ogia:

kristalean diamantea ikusi gure begiak.

 

Suspertu zituen zure su-lamak

inperfekzio-sentiera eta zaputzen zama.

 

Barkatzen dizkizugu albo-kalteak:

erreinu anbiguo orok ditu mesedeak.

 

Baina orain agur, Mary Blair gaztea:

Aleah Chapin-en bandokoak gara.

 

Hiperrealismoaren debozioan datza gure etika,

zahartzaroaren fisika, kimika eta estetika.

 

Atera gaitzazu gaitz guztietatik, izan naturalak,

estralurtarrak, militarrak edo paranormalak.

 

Eta bedeinkatuak zure koloretako arkatzen fruituak:

Errauskine, Alizia, Peter Pan. Amen.