HERIOTZA ETA NESKUTSA

 

 

              ALLEGRO

 

Beste batzuekin desfilatu nuen meskitan,

babutxa fin eta satinezko diademaz,

amoranteari eskutik oratuta, primaderan,

feriara joateko legez apainduta.

 

Begiak jaso nituen astiro,

profeta apart hari begiratzeko:

berrogei bat urte, zilbota, bizarra beltza.

 

Nire bularra laua zen arestian,

ezpata bat bezainbestean.

Oraindik ez neukan hileko odolik.

 

 

              ANDANTE CON MOTO

 

Senarraren hortzek triskatu zizkidaten ezpainak.

Kontsolazio-salda egin zuen nire haragiaz,

neure zerraldorako lehenbiziko mondarra.

 

 

              SCHERZO. ALLEGRO MOLTO

 

Jo ezazue, jo, laute eta arrabita!

Harro bitza zuen putzak basamortuko hondarrak.

Baduzue, jakina, beste zereginik munduan.

Hautsia dut nik besoa baina;

sabela, ordea, emankorra.

 

 

              PRESTO

 

Heriorekin dihardut eztabaidan.

Goiza zabalduz gero hasten da gerra-dantza.

 

R. naiz ni, bakarlaria,

bere kautan abesten duen dontzeila,

gauez artaziekin amets dagien lilia.