XII-b

Itsasoko perilak ¹

Kontxatik² doha untzia,

Han konpainia guzia,

Ternuarat badohazi,

Zerbait nahiz irabazi.

Bide luze Ternuarat,

Itsasoa zabal harat,

Zubirik ez pasatzeko,

Marinelen salbatzeko.

Itsasoaren ganean,

Untzi tzar baten menean,

Marinela hirriskuan,

Herioaren eskuan.

Haize largoz badohazi,

Zabalerat irabazi,

Itsasoan barna urrun,

Begiz ezin ikhus Larrun.

Han jotzen ditu kontrestak,

Mendebal haize tenpestak,

Denbora gaiztoa sartzen,

Gabitau biak erortzen.

Zelu guzia isuri,

Babazuza eta uri,

Marinelak trenpatuak,

Hotz handiak kharronduak.

Bela guziak harturik,

Belaxoa anekaturik³,

Untzia badoha segiz⁴,

Itsasoa handiegiz.

Gau beltzean, ilhunbean,

Untzia tormentapean,

Aparailua desegin,

Ilhunez deus ezin egin.

Elementak badarontsa,

Itsasoak habarrotsa,

Haize tenpesta uxia⁵ da,

Itsasoan maskarada.

Furakanaren⁶ furia,

Ifernuko iduria,

Satan beltzak darabila,

Untzien galtzen dabila.

Marinelak harrituak,

Tronpen jotzen unhatuak,

Gabetu indar guziez,

Etsitu bere biziez.

Uhainek untzia joka,

Gorabehera saltoka,

Eta branka pulunpaka,

Kostaduba arrolaka⁷.

Uhin baten bizkarrean,

Bi uhinen hondarrean,

Tirabira badabila,

Untziak agertzen gila.

Bere⁸ mastak galdu ditu,

Untzia motz da gelditu,

Itsasoak hautsi lema,

Trebes galtzerat darama.

Uhin hautsiak gainetik,

Iragaten trebesetik,

Marinelak erorika,

Untzi askan igerika.

Koartera⁹ dio eraman,

Kostadua barnat eman,

Gain guzia arrasatu,

Untzi zolera urratu.

Gaineko zubia hautsi,

Ura tilaperat jautsi,

Tilapean ura gora,

Untzia doha hondora.

Marinelak biluziak,

Luzatu nahiz biziak,

Uhin pean igerika,

Untzi puskei atxikika.

Ura¹⁰ non berma ez du,

Ez aireak nondik lothu,

Untziak ez zimendurik,

Han ez da salbamendurik.

Marinelaren bentura,

Itsasoan sepultura,

Sekulako bere fina,

Etxerako berriz mina¹¹.

        [1] Eskuizkribuaren oharra: très-belle.

        [2] XVII. mendean Ziburutik Sokoarako badiari deitzen zitzaion Kontxa.

        [3] Anegar gaztelerazkotik: bustirik, blaiturik.

        [4] Zeharka.

        [5] Marmartsua.

        [6] Hurakana.

        [7] Rolar gaztelerazkotik, haizeak norabidez aldatzea.

        [8] BZ: bela.

        [9] Cuartel, «baldin eta XVI. mendean coarter hitzaren esanahia bataller edo brankako gaztelua (castillo de proa) edo sabaiziloko (escotilla) hesiola (cuartela) ez bada, irakurtzen duenak uler beza» (Migel Laburu, Itsas Dokumentu zaharretan erabilitako hitzak jasotzen dituen hiztegi laburra. Gipuzkoako Foru Aldundia, 1992).

        [10] BZ-k: urak.

        [11] BZ, berri mina.