Poesia kaiera
Poesia kaiera
Seamus Heaney
itzulpena: Xabi Borda
2017, poesia
64 orrialde
978-84-17051-05-1
Seamus Heaney
1939-2013
 
 

 

Bihitegia

 

Ebanozko legar gisa pilatzen ziren jotako artaleak

Edo porlana bi belarridun zakuetan bezain trinko.

Iluntasun lizunduak baserriko lanabes, uhal

eta goldez osatu armategia biltzen zuen.

 

Zorua gris sagu koloreko, leuna hormigoi hotzez egina.

Ez zuen leihorik, hormapiko bakoitzaren

Aire-begietan hauts printzen urrea

Alderik alde. Ate batek bidea ixten zion haizeari

 

Uda guztian zinka labe baten pare kiskalgarri zegoenean.

Sega baten ahoa, pala garbi bat, sardearen hortzak:

Sartu eta astiro-astiro objektu distiratsu egiten ziren.

Gero armiarma sareak sentituko zenituen biriketan mamitzen

 

Eta bizkor larri jotzen zenuen atari argitsuraino —

Eta gauean saguzarrak loaren teilatuen gainean hegan,

Begi distiratsuak bekoz beko zuri so

Bazterretan pilaturiko garau artetik, basati, kliskarik egin gabe.

 

Iluntasuna teilatu bat bezala amiltzen zen. Ni lastoa nintzen

Aire-zuloetatik igarotzen ziren txorien mokoentzat.

Ahuspez egoten nintzen hartua ninduen izua uxatu beharrez.

Bi belarridun zakuak arratoi itsuak bezala hurbiltzen ziren.