AZKENIK

Berandu,

baina iristen ari naiz.

Iristen aldizkako poz betera,

kilima-hotsera,

bihotza begietan,

ume handiagoen keinuetan zureak

imajinatzera.

Zu oinez ikasten

—goizetan puskaz baldarrago

iluntzeetan baino—.

Hutsetik abiatzen egunero.

Zu burrun miau txutxu.

Iristen ari naiz, azkenik.

Berandu,

baina iristen.

Katuka zabiltzala jada.

Beranduegi, guztiak behar baitu

besteak baino lehen.

Lepauztai zamatuari laztanka,

ezin diot pentsatzeari utzi

batzuk ez direla sekula

pisu honetatik libratuko.