7 HILABETE

Lanera azkarregi itzultzeagatik

haurreskolan goizegi uzteagatik

lan ordaindurik ez egiteagatik.

Hazierari buruzko behar beste liburu

ez irakurtzeagatik

liburuek diotena ez betetzeagatik.

Zure aurrean negar egiteagatik

amorratzeagatik

negarrez ari zarela beste norbaitek

sosega zaitzala desiratzeagatik.

Zurekin jolasteko gogorik ez izateagatik.

Lehenengoz ahuspez jartzea lortu duzun unean

zuri begira ez egoteagatik.

Jendez inguratuta egonda ere

bakar-bakarrik sentitzeagatik

lagunen falta izan arren ez deitzeagatik

komunean gotortzeagatik

inoizka bakarrik —eta patxadaz— gosaltzearekin

fantaseatzeagatik.