NIRE GELA

Poza zen gailen

alokairuko etxe berrira aldatu ginenean.

Kartoizko kaxazko gaztelu bat:

sukalde-sala zabala, komuna eta hiru gela.

Handiena ametsentzat,

tartekoa etor zitezkeenentzat

eta hiruretan argitsuena

niretzat.

Lanerako gela bat, bizitzan estreinakoz:

apalategi bete liburu

aurreko etxeari ebatsitako mahaia

lore sikatuzko leihate bat,

itsasotik ez hain urrun.

Norberarena behar zuena, baina,

beste norbaitena da orain.

Sehaska arantzaduna,

airez husten ari den pilateseko baloi urdina

eta esekitoki tolesgarri bat,

arropa txiki-txikiz josia.