KOREOGRAFIA

Maddiri, eta Pauleri.

Dantzari bat

oholtza gainean

erditze bat antzezten.

Uzkurtze orok

irudi du egiazkoa

sekula halakorik

bizi izan ez dugunontzat.

Dantzan ari dela

zu erditze-gela batean.

Ni hamasei asteko.

Bion ama urduri dago.

Mugikorrari begiratu diot

antzokiko ilunpean.

Amaren lau dei galdu,

zuen berririk ez.

Luze joango da gaua.

Goizaldeko ordu bietan, argazki bat;

larru gorria izara zurietan bil-bil.

Negar egin nahi baina

ez zait malkorik atera.

Zuk ibilitako bidean noa

narrasean.

Nekeza zait sinistea

nik aurrez urratuak zuk bezala

zureari txiki geratuak nireak

jantziko dituela

noizbait.