BESTE AMEK

Lasterka heltzen naiz,

presaka alde egin.

Bizpahiru orduz biziraun dezakezu,

gehienera, ni gabe.

Ezin dut ekidin amatasuna

lehiaketa bat dela

ohartarazi zidan lagunaz

maiz-maiz oroitzea.

Beste amek zoriontsuak dirudite

paseo goiztiarrenetan.

Egiaz ez ote dute ezer

bestela egiten saiatzeko

premiarik sentitzen?

Beste amek liluraz dihardute

erdiondoko saioetan.

Kokots dardartiz ni, biluzi,

neurez kafe bat ere

hartuko ez nukeenekin mintzo.

Beste amek badakite

apnean bizitzen;

ez dute gogoan Sylvia Plath,

ez dute aditzen erre usainik.

Pertzentiletik kanpora ni,

besteek homologatzea nahi eta

izan behar zuenaren eta denaren

izan beharko nukeenaren eta

izatera iristen naizenaren

arteko tarte honetantxe

labainka.