ISLAK

Min daukat saihetsetan.

Baina lagunek guapa,

ezagunek txalo —begiekin—,

ezezagunek irribarre pasaeran.

Zegokidana betetzen ari naiz,

azkenean.

Baldar noa;

aurretik doakit sabela,

pauso batzuk atzeragotik, ni.

Batzuetan ahaztu egiten zait

buztinezkoa naizela.

Buztinezko jainkosa tripaduna.

Orduan gertatzen da:

ezustean harrapatzen nau

ispilu itxurako zernahik

eta bihotzak jauzi egiten dit

eztarri-zuloan gora.