AZKEN BAINUA

Etxepeko txinatarrak

margotu zizkidan azkenekoz,

gorri bizi-bizi,

bizkarra kakotuta, burua makur

neure oinetara.

Klasea ilustratzeko

estanpa perfektua ginen.

Geroztik, kristalak garbitu

eta armairu-hondoak ordenatu ditut.

Habiaren sindromea omen;

guztia luizitu aurretik

guztia dagokion lekuan dagoela

berresteko behar larri hau.

Arraro dauzkat behatzak,

uda sasoia izanagatik

margo arrastorik gabe

—emaginaren aginduz—.

Hondartzara bidea sandaliatan;

ni eta nire alderakarga

asfalto errea higatzen.

Berandu da,

apenas dagoen beste inor.

Putzu urdinean murgil

soinari flotatzen utzi

gaurkoa azkena izan daitekeela jakinik.