NIRI ERE BAI

 

 

Nik banekien, eta hala ere egin zidaten.

Nahia Alkorta

 

 

 

Azpil bete guraize,

bentosak eta odola,

lausotan.

 

Terrorezko film bat,

bbvaren spot sonatua,

arnasten ahaztu zitzaidan eguna.

 

Bere izenik ere aipatu ez zidan

ginekologoaren aurpegia

—musuko batek erditik bi egina—,

emagin gazteari hatzak goratuta bota zion

“ponme crema” hura.

 

“Este parto lo voy a dirigir yo”.

 

Azalpenik gabeko presa.

 

Eta hatzak baginan.

Hatzak sabelaren goialdean.

Saihetsetan. Eztarrian.

 

Egin al daiteke

garrasi

barrurantz?

 

Beste modu batera

hitz egin ziezadala erregutzeko

zorian egon nintzen.

 

Irentsi egin nituen hitzok

eta eskerrak —edo ez, ez dakit—.

Mamurtu ahala irentsi

erditze-plana bera ere.

 

Amore eman nuen;

zabalik behar nuenean

neure baitara oskoldu.

Utzi egin nintzen, nion;

egin nirekin nahi duzuna.

 

Arindua baizik ez nuen sentitu

nire gainean jarri zintuztenean

—ezin nezake gogoratu nork

jarri zintuen ere—.

 

Nago, sarri irakurri izan dudala bortxaz

urruneko zerbait balitz bezala,

besteri bai baina norberari

gerta ez dakiokeen zerbait.

 

Erditze normala.

Hala ageri zaigu paperetan.