AMAPOLA HAZI BAT

Astelehena zen,

astelehen berunezkoa.

Errekondotik gentozen oinez

zerua herdoil kolore.

Asteburuan neure gorputzaz beste

eginda ni, beste behin.

Bularrak hantu,

norbait barrutik puzka balute bezala;

kuleroetan orbanik ez.

Farmaziatik igaro ginen etxerakoan

—badaezpada ere—

atrakatzaile hasiberriaren dardara ahotsean.

Komunean

barre eta negar aldi berean:

nik negar eta zuk barre.

Desio nuen

ez nuen espero, haatik. Oraindik ez.

Amapola hazi baten tamaina zuela leitu genuen.

Sabelari laztan egin nion

aurreneko aldia izan zen.