HEZURREN MINTZOA

Utzi egin behar diozu

laster egiteari, gizona!

Ba ez dakizu ba,

medikuak esan gabe ere,

mesedegarriagoa dela,

adibidez, igeri egitea,

guretzat batik bat,

kalte egiten digulako

asfaltoaren aurkako

talka bortitz bortxatuak.

Zer uste duzu garela?

Zer uste duzu zarela?

Utzi egin behar diozu

laster egiteari, gizona!

Gure mintzik barnekoetaraino

daukazu sartua

ohartuki zein oharkabean

bizi izan duzun oro,

beteta gauzkazu, enpo,

eta ez gaude jada

zure apeta txoroen

mende bizitzeko.

Ez zara jabetzen zu garela?

Ez zara jabetzen gu zarela?

Utzi egin behar diozu

laster egiteari, gizona!

Harrapatu behar zaituena

aspaldidanik da bidean,

horretaz jabetua egoteko

nahikoa behar zenuke

guri kasu pixka bat egitea,

baina laster egitera irteten zara,

zer eta erlojuari begira gainera.

Noiz ikasiko duzu

hezurretan, hezurrekin,

hezurretatik ulertzen?