JAIOTERRIAN

Jaioterrira itzultzea

hemen jolasten gintunan txikitan

esatea dun, hor jaio zunan gure ama,

han zeukanan aita zenak

denda ere bazen tailerra,

fabrika hartan

lan egiten zinan arrebak,

lagun min batekin joka eta borrokan

hasi nindunan plaza horretan,

eraikin honetan zegonan eskola

bost urte nituenean,

negar egin ninan

ekarri ninduten aurreneko egunean,

eta oraindik ere mundua isiltzen zaidanean

barruan entzuten dudan negarraren

hasiera izan zunan hura.