ZORTZI ABIZEN EUSKALDUN

Zortzi ez,

hamasei,

hirurogeita lau,

lau mila eta laurogeita hamasei

abizen euskaldun

dauzkadala uste dut.

Nahi edo behar dituzuen adina.

Ikertu itzazue beldurrik gabe.

Neu ere iker nazakezue,

miatu kanpo eta barru

zokondorik gordeenetaraino.

Nahi edo behar dituzuen

ondorioak oro ateratzeko

erraztasunak emango dizkizuet,

antropologia garaikidearen

garapen zuzenaren mesede.

Ezer ondorioztatzekotan, baina,

zeuen abizenei egotzi epaia.