URRUNAREN MAITEZ

Urrunaren maitez

urruna gertuko

bihurtu nahi dugu,

oinazez bada ere,

nekez eta zauriz.

Ikasia dugu

urruntasuna dela

urrunaren maitez

maite dugunaren

dohain berezkoetakoa.

Baina gurea dugu,

berezko hori ere,

gerturatzeko sena,

ahaleginaren mina,

minaren atsegina.

Urrunaren maitez

urrundik gerturatua

alferrik da ekarria;

lilura oro galdua,

gure ezinaren irudia.

Urrunaren maitez

gerturatzeko sena,

nahi bada nahi gabe

nahi ez bada nahita,

bizitzaren indarrez.