KOITADURIA

Beti da handia koitaduria,

errukitegien eta gupidarrien jarioa,

gertukoena zein urrunekoena,

noranahi begiratuta ere mingarri,

eta horrekin bizi behar.

Ez zara ohitzen,

ez zara laketzen,

baina bereizketak egiten

ikasten duzu,

distantziak neurtzen

zeure larrua babesteko.

Hura etengabe hazi ahala,

gero eta atxikiagoa zaude

gertuko koitaduriari,

gero eta gertukoagoari,

zeu ere gero eta koitaduago,

harik eta zeure koitaduria

baino ezin neurtu duzun arte.