Izan zarete inoiz katuen kanposantuan?

Ez da harritzekoa

katuen eskelak ez dira egunkarietan azaltzen

baina katuen kanposantuak oso zabalak dira

edozein hilerri arrunt baino hamar bider

handiagoak gutxienez

geografia asko jakin behar da katu izateko

Katuen kanposantuetan metroan ibiltzen dira

txartelik gabe alargunak

eta mapak daude sarrera bakoitzean norberak

bere katuaren hilobiari loreak jar diezazkion

ilundu aurretik

katuen hilkutxak gereziondoen zuraz eginak dira

katu guztiak botak soinean hiltzen direla

gogorazten digu sarrerako idazpuruak

Guduetan jende asko galdu da egia

baina nork zenbatu ditu katu anarkisten hilotzak

zazpi aldiz biderkatuak

Lurpean trenek mustaxa atontzen dute

gillette marrazekin katuen igandeetan

pauloven zakurrak ateratzen dira paseatzera

katuen kanposantuan

kea ereinez gero basamortuak biltzen dira

Gauzak asko aldatu dira

lau aldiz hildako katuak sabiniarren akademiara

apuntatu zirenetik ingelesa ikastera

katuen kanposantuak zazpi probintzia ditu

erruz garestitu da hilobien akuratze tasa

eta estrata bat eskaini diote

erreboltaburu anarkistari

katuen kanposantuko auzunerik dotoreenean

Katuen kanposantuan

krisia dago langabezia eta loradenda bat non

arras merkeak diren san martin loreak

pozoinaren urrats itzaliak tustatzean

katuek badakite

heriotza bere buruaz beste egin nahian dabilela

eta halakoetan begiak hersten dituzte

Begiratu katuen hilobiak

garagardoak eraman zuen hura

beste hark berriz pipan bakarrik erretzen zuen

bere maitalea zortzigarren bizitza bat

ebasten harrapatu zuten

Baina alferrik da gehiago luzatzea

katuen hilerrian egon ez denak ezin

imajina dezake nola harramaska

egiten dion isiltasunak gauerdiari

Norbaitek pentsa dezake agian gezurra diodala

eskailerapean ezkutatzen direla katuak

ogi maluten bila goseak akabatzen

baina izan badira katuen kanposantuak

ni naiz katuen beilaria hemen bizi naiz

katu anarkista ospetsuena hil zuten estrata berean

Belarri zutunak eta buru ttipi harrituak

aspaldiko partez

elurra hasi du katuen kanposantuan