EGUN TXIKIEN AROA

Orain den-dena

beste norabait doa.

Jose Luis Otamendi

Itoizko solidarioen ekintza

dakar gaur prentsak

nola moztu zituzten

porlana garraiatzen zuten

sei kableak

nola lortu zuten

aldi batez dena

etetea.

25 urte eta argazkian zutik urtegia.

Iulen Madariaga hil da biharamunean

eta belaunaldi haren inguruan irakurtzen

ez daukat garbi

noraino sar daitekeen

bizi gabeko garai baten

zalantzetan

galdu-mina zer den ere ez dakit dakidan.

Galdetzen dudana da

erresistentziak eta etikak

forma berri bat har dezaketen

aro bakoitzean

zer den ukiezina definizioan.

Idatzi dut eta gero ezabatu:

hizki handien ondotik heldu gara gu.

Urtemugekin betetzen ditugu

egun berrien azalak

eta haiei esker ikasten dut ostera

garai hau ez dela beti

izan zitekeena.