HILDAKOEN EGUNA

Bizidunak soilik galdetzen du nork

eraman dezakeen Erromako erramua gaur:

hildakoek nola baizik ez diote.

W.H. Auden

Hildakoen eguna da gaur

bizirik garenontzat.

Inork ez darama erramurik

itsasertzean

jaiegunetako paisaia

itxuratzen doa jendea.

Hego haizea dabil

eta hondartzara jaitsi gara

eramateko kafe bana eskuetan.

Frantsesez mintzo den adineko

bikote bat jarri zaigu aurrean

urdinduta, zimurtuta, gihartsu

biluzten hasi dira

barruko arropetan sartu

uretara.

Handik begiratu digu andreak

besoak jaso ditu

bizitza ospatuko balu bezala.

Txalo egin diogu eskuak airean

berekin ospatu.

Ingurua behatu eta itsasoari

so gaude denok.

Harantz esertzen da

jendea hondartzan

non

daudenen eta ez daudenen

abaroa bat bera den.