HERIO ONDOAN ERREZITATZEKO

Jaun-andreok, burutu duzue progresorik nabarmenena,

    Eta progresoa, konforme, bedeinkazioa da;

Aparka daitekeen baino auto gehiago egin duzue,

    Soinuaren muga hautsi, eta berehalaxe

    Musika-kutxak paratuko bide dira Ilargian:

Baina mesedez, gogora ezazue, oroz gainetik,

Ni, Herio, beti izan eta izanen naizela Kosmokrata.

Gazte eta ausartekin libertitzen naiz, nik nahieran,

    Mendizalearen urratsak harri pitzatuaren gainean,

Itsaskirriak daramatza igerian dabiltzan mutikoak,

    Beso lokartura doa armiarmaren ziztada:

    Beste batzuekin itxoiten dut zahartu arte

Nire apetaren arabera eragin aurretik

Koronaria hari, tumorea honi.

Zabala naiz erlijio eta arrazekiko;

    Zerga-aitorpena, mailegua, anbizio soziala

Bost axola niri. Buruz-buru topo eginen dugu,

    Zure medikuaren botika eta gezurren gainetik,

    Beztitzailearen eufemismo garestien gainetik:

Westchester-eko emaginak eta Bowery-ko arloteak,

Biek ere nik jotako airera dantzatuko dute.