MUXU BATEN HISTORIA

Ez da maitemintzeko garaia,

besarkadarik gehiago ez

itsasoari begira.

Ilargiak baturiko begiradarik ez, mesedez,

bihotza taupaka jartzen duen sexu lurrinez.

Ez bagenuen maitatzen ikasi

ez da orain maitale misteriotsuetara

jostatzeko unea.

Ez da maitemintzeko aroa orain,

bizitza gozatzekoa baizik,

eguzki xume baten menpe

egunak igaro,

etorkizunari begiratu

mehatxuzko laino ilunik gabe,

ardo bat edan

denbora iraungi dadin itsas-hegian.

Ez da maitemintzeko unea honezkero,

utzi haserreei eta saminei

kaioen kalakan hegaldatzen,

leun eta arin doan ontzian

baketuko da bihotza.

Begirada samurren aroa da,

sahatsaren eta kresalaren

arteko muxuarena.