SEULEMENT AVEC LES DOMESTIQUES

        Phillippe Veyrin artista euskaltzaleak argitaratu zigun Julien Vinsonek entzun omen zuen xarma miarrotaz beteriko solas hauxe, paparrean hainbat kondekorazio zeuzkan gizonezko baten eta dama errespetagarri baten artekoa:

        Artzain artisau jostun olagizon hargin morroi zamaketari mandazain inude errekardari mahastiri laborari neskame arrantzaleen hizkuntza izan da atzo arte: arrazoia zeukan Unamunok, euskara egokia zen behiak nola janaritu eztabaidatzeko, arrazoia zeukan Barojak, ezein euskalduni ez zitzaion otuko Hegel-en Logika itzultzea.

        Intelektual biok, itsugarrizko argitasunez, hizkuntza bera ikusteko gai ziren arren, ez zeukaten ahalmenik ageriagoa atzemateko, hizkuntza hura berba egiten zutenek klase apal eta zapal bat osatzen zutela.

        Eta euskal baserritarrek, esaterako, Hegel irakurri ahal izanen zuten noizbait, zer duda egin, gaztelaniari esker. Horretan laketzen ziren Torrelavegakoak.