JOXERRA AGIRREK
HIL ONDOREN
( a )
Zer putada!
Baina, beno, egin dugu handiena.
Beste aldean nago, jada.
Kostatu da, ez pentsa!
Gauza zaila da hiltzea,
zaila, egin arte, batez ere,
aldaketa
berebizikoa da eta.
Hala ere, esan beharra dizuet,
kimika organikoaren mekanika aurresan errazari utzi,
eta, ezinbestean, ezerezko zera zeratze honi lotzean,
aisatu egiten da bat:
ez dago erregairik
ez eta, beraz, zaborrik;
ondorioz, jeneral eta sukaldariek
jai daukate hemen,
zaborrik ezean ez baitago ez gerra, ez janaririk.
Bizitza oso prozesu bitxia duzue
baina izugarri zikintzen du, badakizue.
Gainera konbustiorik ezean
bat ez da ahitzen
eta, klaro, hori bentaja handia da.
Denbora ahuntzaren gauerdiko eztula izanik,
kausa-ondorio arau gabeziak
ezinegona sortzen dit,
aitortu beharra dizuet,
oroimena hutsean gelditzen delako
batez ere, baina,
bestalde, oroimenik gabe ere
halako arintasun bat sumatzen duzu
eta, klaro, hori ere bentaja handia da.
Antolaketari dagokionez,
badirudi fededunek kale egin dutela:
hemen Jainkoaz-eta
rian de rian.
(Parrandan omen dabil
kargugabetu zutenetik.)
Fedegabeena, aldiz, ez dago argi,
zenbait zurrumurruren arabera
ezerezaren zera hau zeratzen jarraituko omen dugu,
beste batzuen arabera, ordea,
hemen aldi bat egon
eta errenkarnatu eginen omen gara.
Honaino etorri eta duda-muda ibili beharra ere,
ez da makala!
Gehiago ezin dizuet esan
etxeko arauak omen dira, enfin...
Helmuga antzeko honi buruzko interesa pizteko
gorde behar omen da mixterioa.
Oi kuanto toki turistikoa!
Ez da luze hemen nabilela
baina lepoa eginen nuke:
zuzendaritza taldea burutik arraso jota dago.
Barkatu... deika ari zaizkit,
azkeneko gauza bat,
horrela gure artean geldi bedi,
euskaldunok, ohi bezala, elkarrekin gaude
zera zeratuz ari garelakoan zera zeratzen, badakizue...
Enfin, ez legokeela gaizki
beste alde hau
atzean utzitakoarengatik ez balitz.
Baina, barkatu, joan beharra daukat,
deika ari zaizkit. © Juanjo Olasagarre