EPE LUZEKO
HELBURU ETA NAHIAK

Epe luzeko helburu eta nahiak maite ditut,

hain epe luzeko ze, badakidan

ez ditudala aseko inoiz.

Epe luzeko bidaia-planak,

hain epe luzeko ze, badakidan

ez dudala hiri hori ezagutuko sekula.

Hizkuntza eslaviarrak ikastea, demagun,

badakidanez, masokistaren pozez,

haiek ni menperatuko nautela.

Epe luzeko lagunak maite ditut,

hain epe luzeko ze, ez dakidan

lagun garen ala maitale.

Epe luzeko maitasmoak maite ditut,

ez baita orbanik sortzen

—ezta ohitura derrigorra ere—.

Epe luzeko eztabaidak

non ez den inorena arrazoia

—non eta ez den biona—.

Epe luzeko zenbait zauri,

hain epe luzeko ze, badakidan

bihurtuko direla

galdera ikur laztankorrak aurki.

Epe luzeko desio eta nahiak maite ditut:

batere bete gabe

bihurtzen direnak

                                   epe luzeko

beste nahi eta desio.